Aeschylus Seven against Thebes

Herbert Weir Smyth

Tragedy

Epic

Heatmap options Heatmap by line/paragraph

Heat options Heat by tragedy vs. epic (default) or speech vs. narrative (toggle on)

Table of Contents:

← Previous Next →

Χορός

ὦ μεγάλε Ζεῦ καὶ πολιοῦχοι

δαίμονες , οἳ δὴ Κάδμου πύργους

τούσδε ῥύεσθε ,

πότερον χαίρω κἀπολολύξω
825

πόλεως ἀσινεῖ σωτῆρι . . ,

ἢ τοὺς μογεροὺς καὶ δυσδαίμονας

ἀτέκνους κλαύσω πολεμάρχους ;
830

οἳ δῆτʼ ὀρθῶς κατʼ ἐπωνυμίαν

καὶ πολυνεικεῖς

ὤλοντʼ ἀσεβεῖ διανοίᾳ .

str. 1

Χορός

ὦ μέλαινα καὶ τελεία

γένεος Οἰδίπου τʼ ἀρά ,

κακόν με καρδίαν τι περιπίτνει κρύος .

ἔτευξα τύμβῳ μέλος
835

Θυιὰς αἱματοσταγεῖς

νεκροὺς κλύουσα δυσμόρως

θανόντας · ἦ δύσορνις ἅ-

δε ξυναυλία δορός .

ant. 1

Χορός

ἐξέπραξεν , οὐδʼ ἀπεῖπεν
840

πατρόθεν εὐκταία φάτις ·

βουλαὶ δʼ ἄπιστοι Λαΐου διήρκεσαν .

μέριμνα δʼ ἀμφὶ πτόλιν ·

θέσφατʼ οὐκ ἀμβλύνεται .

ἰὼ πολύστονοι , τόδʼ ἠρ-
845

γάσασθʼ ἄπιστον · ἦλθε δʼ αἰ-

ακτὰ πήματʼ οὐ λόγῳ .

Χορός

τάδʼ αὐτόδηλα , προῦπτος ἀγγέλου λόγος ·

διπλαῖ μέριμναι , διδυμάνορα

κάκʼ αὐτοφόνα , δίμοιρα τέ-
850

λεια τάδε πάθη . τί φῶ ;

τί δʼ ἄλλο γʼ ἢ πόνοι πόνων

δόμων ἐφέστιοι ;

ἀλλὰ γόων , ὦ φίλαι , κατʼ οὖρον

ἐρέσσετʼ ἀμφὶ κρατὶ πόμπιμον χεροῖν
855

πίτυλον , ὃς αἰὲν διʼ Ἀχέροντʼ ἀμείβεται

τὰν ἄστολον μελάγκροκον ναύστολον θεωρίδα ,

τὰν ἀστιβῆ Ἀπόλλωνι , τὰν ἀνάλιον

πάνδοκον εἰς ἀφανῆ τε χέρσον .
860

ἀλλὰ γὰρ ἥκουσʼ αἵδʼ ἐπὶ πρᾶγος

πικρὸν Ἀντιγόνη τʼ ἠδʼ Ἰσμήνη ,

θρῆνον ἀδελφοῖν · οὐκ ἀμφιβόλως

οἶμαί σφʼ ἐρατῶν ἐκ βαθυκόλπων

στηθέων ἥσειν ἄλγος ἐπάξιον .
865

ἡμᾶς δὲ δίκη πρότερον φήμης

τὸν δυσκέλαδόν θʼ ὕμνον Ἐρινύος

ἰαχεῖν Ἀίδα τʼ

ἐχθρὸν παιᾶν ʼ ἐπιμέλπειν .
870

ἰώ , δυσαδελφόταται πασῶν ὁπόσαι

στρόφον ἐσθῆσιν περιβάλλονται ,

κλαίω , στένομαι , καὶ δόλος οὐδεὶς

μὴ ʼκ φρενὸς ὀρθῶς με λιγαίνειν .

str. 1

Χορός

ἰὼ ἰὼ δύσφρονες ,
875

φίλων ἄπιστοι καὶ κακῶν ἀτρύμονες ,

δόμους πατρῴους ἑλόν-

τες μέλεοι σὺν αἰχμᾷ .

μέλεοι δῆθʼ οἳ μελέους θανάτους

εὕροντο δόμων ἐπὶ λύμῃ .
880

ant. 1

Χορός

ἰὼ ἰὼ δωμάτων

ἐρειψίτοιχοι καὶ πικρὰς μοναρχίας

ἰδόντες , ἤδη διήλ-

λαχθε σὺν σιδάρῳ .
885

κάρτα δʼ ἀληθῆ πατρὸς Οἰδιπόδα

πότνιʼ Ἐρινὺς ἐπέκρανεν .

str. 2

Χορός

διʼ εὐωνύμων τετυμμένοι ,

τετυμμένοι δῆθʼ ,

ὁμοσπλάγχνων τε πλευρωμάτων
890

αἰαῖ δαιμόνιοι ,

αἰαῖ δʼ ἀντιφόνων

θανάτων ἀραί .

διανταίαν λέγεις πλαγὰν δόμοισι καὶ
895

σώμασιν πεπλαγμένους , ἐννέπω

ἀναυδάτῳ μένει

ἀραίῳ τʼ ἐκ πατρὸς

οὐ διχόφρονι πότμῳ .

ant. 2

Χορός

διήκει δὲ καὶ πόλιν στόνος ,
900

στένουσι πύργοι ,

στένει πέδον φίλανδρον · μένει

κτέανα δʼ ἐπιγόνοις ,

διʼ ὧν αἰνομόροις ,

διʼ ὧν νεῖκος ἔβα
905

καὶ θανάτου τέλος .

ἐμοιράσαντο δʼ ὀξυκάρδιοι

κτήμαθʼ , ὥστʼ ἴσον λαχεῖν .

διαλλακτῆρι δʼ οὐκ

ἀμεμφεία φίλοις ,

οὐδʼ ἐπίχαρις Ἄρης .
910

str. 3

Χορός

σιδαρόπλακτοι μὲν ὧδʼ ἔχουσιν ,

σιδαρόπλακτοι δὲ τοὺς μένουσι ,

τάχʼ ἄν τις εἴποι , τίνες ;

τάφων πατρῴων λαχαί .

ὅδʼ ἁμῶν μάλʼ ἀχέτας τοὺς
915

προπέμπει δαϊκτὴρ γόος αὐ-

τόστονος , αὐτοπήμων ,

δαϊόφρων δʼ · , οὐ φιλογαθής , ἐτύμως

δακρυχέων ἐκ φρενός , ἃ

κλαιομένας μου μινύθει
920

τοῖνδε δυοῖν ἀνάκτοιν .

ant. 3

Χορός

πάρεστι δʼ εἰπεῖν ἐπʼ ἀθλίοισιν

ὡς ἐρξάτην πολλὰ μὲν πολίτας ,

ξένων τε πάντων στίχας

πολυφθόρους ἐν δαΐ .
925

δυσδαίμων σφιν ἁ τεκοῦσα

πρὸ πασᾶν γυναικῶν ὁπόσαι

τεκνογόνοι κέκληνται .

παῖδα τὸν αὑτᾶς πόσιν αὑτᾷ θεμένα

τούσδʼ ἔτεχʼ , οἱ δʼ ὧδʼ ἐτελεύ-
930

τασαν ὑπʼ ἀλλαλοφόνοις

χερσὶν ὁμοσπόροισιν .

str. 4

Χορός

ὁμόσποροι δῆτα καὶ πανώλεθροι ,

διατομαῖς οὐ φίλοις ,

ἔριδι μαινομένᾳ ,
935

νείκεος ἐν τελευτᾷ .

πέπαυται δʼ ἔχθος , ἐν δὲ γαίᾳ

ζόα φονορύτῳ

μέμεικται · κάρτα δʼ εἴσʼ ὅμαιμοι .

πικρὸς λυτὴρ νεικέων ὁ πόντιος
940

ξεῖνος ἐκ πυρὸς συθεὶς

θακτὸς σίδαρος · πικρὸς δὲ χρημάτων

κακὸς δατητὰς Ἄρης ἀρὰν πατρῴ-

αν τιθεὶς ἀλαθῆ .

ant. 4

Χορός

ἔχουσι μοῖραν λαχόντες οἱ μέλεοι
945

διοδότων ἀχθέων ·

ὑπὸ δὲ σώματι γᾶς

πλοῦτος ἄβυσσος ἔσται .

ἰὼ πολλοῖς ἐπανθίσαντες

πόνοισι γενεάν ·
950

τελευταῖαι δʼ ἐπηλάλαξαν

Ἀραὶ τὸν ὀξὺν νόμον , τετραμμένου

παντρόπῳ φυγᾷ γένους .

ἕστακε δʼ Ἄτας τροπαῖον ἐν πύλαις ,

ἐν αἷς ἐθείνοντο , καὶ δυοῖν κρατή -
955

σας ἔληξε δαίμων .

Seven against Thebes. Aeschylus. Herbert Weir Smyth. New York. 1922.

Tufts University provided support for entering this text.

This text was converted to electronic form by professional data entry and has been proofread to a medium level of accuracy.