Euripides Heracles

Λύκος

ἐς καιρὸν οἴκων Ἀμφιτρύων ἔξω περᾷ ·

χρόνος γὰρ ἤδη δαρὸς ἐξ ὅτου πέπλοις

κοσμεῖσθε σῶμα καὶ νεκρῶν ἀγάλμασιν .

ἀλλʼ εἶα , παῖδας καὶ δάμαρθʼ Ἡρακλέους

ἔξω κέλευε τῶνδε φαίνεσθαι δόμων ,

705

ἐφʼ οἷς ὑπέστητʼ αὐτεπάγγελτοι θανεῖν .

Ἀμφιτρύων

ἄναξ , διώκεις μʼ ἀθλίως πεπραγότα

ὕβριν θʼ ὑβρίζεις ἐπὶ θανοῦσι τοῖς ἐμοῖς ·

ἃ χρῆν σε μετρίως , κεἰ κρατεῖς , σπουδὴν ἔχειν .

ἐπεὶ δʼ ἀνάγκην προστίθης ἡμῖν θανεῖν ,

710

στέργειν ἀνάγκη · δραστέον δʼ ἃ σοὶ δοκεῖ .

Λύκος

ποῦ δῆτα Μεγάρα ; ποῦ τέκνʼ Ἀλκμήνης γόνου ;

Ἀμφιτρύων

δοκῶ μὲν αὐτήν , ὡς θύραθεν εἰκάσαι —

Λύκος

τί χρῆμα δόξης ; τοῦ δʼ ἔχεις τεκμήριον ;

Ἀμφιτρύων

ἱκέτιν πρὸς ἁγνοῖς Ἑστίας θάσσειν βάθροις

715

Λύκος

ἀνόνητά γʼ ἱκετεύουσαν ἐκσῷσαι βίον .

Ἀμφιτρύων

καὶ τὸν θανόντα γʼ ἀνακαλεῖν μάτην πόσιν .

Λύκος

ὃ δʼ οὐ πάρεστιν οὐδὲ μὴ μόλῃ ποτέ .

Ἀμφιτρύων

οὔκ , εἴ γε μή τις θεῶν ἀναστήσειέ νιν .

Λύκος

χώρει πρὸς αὐτὴν κἀκκόμιζε δωμάτων .

720

Ἀμφιτρύων

μέτοχος ἂν εἴην τοῦ φόνου δράσας τόδε .

Λύκος

ἡμεῖς , ἐπειδὴ σοὶ τόδʼ ἔστʼ ἐνθύμιον ,

οἱ δειμάτων ἔξωθεν ἐκπορεύσομεν

σὺν μητρὶ παῖδας . δεῦρʼ ἕπεσθε , πρόσπολοι ,

ὡς ἂν σχολὴν λύσωμεν ἄσμενοι πόνων .

725

Ἀμφιτρύων

σὺ δʼ οὖν ἴθʼ , ἔρχῃ δʼ οἷ χρεών · τὰ δʼ ἄλλʼ ἴσως

ἄλλῳ μελήσει . προσδόκα δὲ δρῶν κακῶς

κακόν τι πράξειν . ὦ γέροντες , ἐς καλὸν

στείχει , βρόχοισι δʼ ἀρκύων γενήσεται

ξιφηφόροισι , τοὺς πέλας δοκῶν κτενεῖν

730

ὁ παγκάκιστος . εἶμι δʼ , ὡς ἴδω νεκρὸν

πίπτοντʼ · ἔχει γὰρ ἡδονὰς θνῄσκων ἀνὴρ

ἐχθρὸς τίνων τε τῶν δεδραμένων δίκην .