Euripides Ion

Gilbert Murray

Tragedy

Epic

Heatmap options Heatmap by line/paragraph

Heat options Heat by tragedy vs. epic (default) or speech vs. narrative (toggle on)

Table of Contents:

← Previous Next →

str. 1

Χορός

σὲ τὰν ὠδίνων λοχιᾶν

ἀνειλείθυιαν , ἐμὰν

Ἀθάναν , ἱκετεύω ,

Προμηθεῖ Τιτᾶνι λοχευ-
455

θεῖσαν κατʼ ἀκροτάτας

κορυφᾶς Διός , ὦ μάκαιρα Νίκα ,

μόλε Πύθιον οἶκον ,

Ὀλύμπου χρυσέων θαλάμων

πταμένα πρὸς ἀγυιάς ,
460

Φοιβήιος ἔνθα γᾶς

μεσσόμφαλος ἑστία

παρὰ χορευομένῳ τρίποδι

μαντεύματα κραίνει ,

σὺ καὶ παῖς ἁ Λατογενής ,
465

δύο θεαὶ δύο παρθένοι ,

κασίγνηται σεμναὶ Φοίβου .

ἱκετεύσατε δʼ , ὦ κόραι ,

τὸ παλαιὸν Ἐρεχθέως

γένος εὐτεκνίας χρονίου καθαροῖς
470

μαντεύμασι κῦρσαι .

ant. 1

Χορός

ὑπερβαλλούσας γὰρ ἔχει

θνατοῖς εὐδαιμονίας

ἀκίνητον ἀφορμάν ,

τέκνων οἷς ἂν καρποτρόφοι
475

λάμπωσιν ἐν θαλάμοις

πατρίοισι νεάνιδες ἧβαι ,

διαδέκτορα πλοῦτον

ὡς ἕξοντες ἐκ πατέρων

ἑτέροις ἐπὶ τέκνοις .
480

ἀλκά τε γὰρ ἐν κακοῖς

σύν τʼ εὐτυχίαις φίλον ,

δορί τε γᾷ πατρίᾳ φέρει

σωτήριον ἀλκάν .

ἐμοὶ μὲν πλούτου τε πάρος
485

βασιλικῶν τʼ εἶεν θαλάμων

τροφαὶ κήδειοι κεδνῶν γε τέκνων .

τὸν ἄπαιδα δʼ ἀποστυγῶ

βίον , ᾧ τε δοκεῖ ψέγω ·

μετὰ δὲ κτεάνων μετρίων βιοτᾶς
490

εὔπαιδος ἐχοίμαν .

ep.

Χορός

ὦ Πανὸς θακήματα καὶ

παραυλίζουσα πέτρα

μυχώδεσι Μακραῖς ,

ἵνα χοροὺς στείβουσι ποδοῖν
495

Ἀγλαύρου κόραι τρίγονοι

στάδια χλοερὰ πρὸ Παλλάδος

ναῶν , συρίγγων

ὑπʼ αἰόλας ἰαχᾶς

ὕμνων , ὅτʼ ἀναλίοις
500

συρίζεις , ὦ Πάν ,

τοῖς σοῖσιν ἐν ἄντροις ,

ἵνα τεκοῦσά τις Φοίβῳ

παρθένος , ὦ μελέα , βρέφος ,

πτανοῖς ἐξόρισεν θοίναν

θηρσί τε φοινίαν δαῖτα , πικρῶν γάμων
505

ὕβριν · οὔτʼ ἐπὶ κερκίσιν οὔτε λόγοις

φάτιν ἄιον εὐτυχίας μετέχειν

θεόθεν τέκνα θνατοῖς .

Ion. Euripides. Gilbert Murray. Oxford. 1913.

Tufts University provided support for entering this text.

This text was converted to electronic form by professional data entry and has been proofread to a medium level of accuracy.