Euripides Helen

Gilbert Murray

Tragedy

Epic

Heatmap options Heatmap by line/paragraph

Heat options Heat by tragedy vs. epic (default) or speech vs. narrative (toggle on)

Table of Contents:

← Previous Next →

Ἑλένη

ὤ , μεγάλων ἀχέων καταβαλλομένα μέγαν οἶκτον

ποῖον ἁμιλλαθῶ γόον ; ἢ τίνα μοῦσαν ἐπέλθω
165

δάκρυσιν ἢ θρήνοις ἢ πένθεσιν ; αἰαῖ .

str. 1

Ἑλένη

πτεροφόροι νεάνιδες ,

παρθένοι Χθονὸς κόραι

Σειρῆνες , εἴθʼ ἐμοῖς γόοις

μόλοιτʼ ἔχουσαι Λίβυν
170

λωτὸν ἢ σύριγγας ἢ

φόρμιγγας , αἰλίνοις κακοῖς

τοῖς ἐμοῖσι σύνοχα δάκρυα ·

πάθεσι πάθεα , μέλεσι μέλεα ,

μουσεῖα θρηνήμα-

σι ξυνῳδὰ πέμψειε

Φερσέφασσα
175

φόνια , χάριτας ἵνʼ ἐπὶ δάκρυσι

παρʼ ἐμέθεν ὑπὸ μέλαθρα νύχια

παιᾶνα

νέκυσιν ὀλομένοις λάβῃ .

ant. 1

Χορός

κυανοειδὲς ἀμφʼ ὕδωρ

ἔτυχον ἕλικά τʼ ἀνὰ χλόαν
180

φοίνικας ἁλίου πέπλους

αὐγαῖσιν ἐν χρυσέαις

ἀμφὶ δόνακος ἔρνεσιν

θάλπουσα · ποτνίας δʼ ἐμᾶς ,

ἔνθεν οἰκτρὸν ἀνεβόασεν ,

ὅμαδον ἔκλυον , ἄλυρον ἔλεγον ,
185

ὅτι ποτʼ ἔλακεν αἰάγμα-

σι στένουσα , Νύμφα τις

οἷα Ναῒς

ὄρεσι φυγάδα νόμον ἱεῖσα

γοερόν , ὑπὸ δὲ πέτρινα γύαλα

κλαγγαῖσι

Πανὸς ἀναβοᾷ γάμους .
190

str. 2

Ἑλένη

ἰὼ ἰώ ·

θήραμα βαρβάρου πλάτας ,

Ἑλλανίδες κόραι ,

ναύτας Ἀχαιῶν

τις ἔμολεν ἔμολε δάκρυα δάκρυσί μοι φέρων .
195

Ἰλίου κατασκαφαὶ

πυρὶ μέλουσι δαΐῳ

διʼ ἐμὲ τὰν πολυκτόνον ,

διʼ ἐμὸν ὄνομα πολύπονον .

Λήδα δʼ ἐν ἀγχόναις
200

θάνατον ἔλαβεν αἰσχύ-

νας ἐμᾶς ὑπʼ ἀλγέων .

ὁ δʼ ἐμὸς ἐν ἁλὶ πολυπλανὴς

πόσις ὀλόμενος οἴχεται ,

κάστορός τε συγγόνου τε
205

διδυμογενὲς ἄγαλμα πατρίδος

ἀφανὲς ἀφανὲς ἱππόκροτα λέ-

λοιπε δάπεδα γυμνάσιά τε

δονακόεντος Εὐρώ-
210

τα , νεανιᾶν πόνον .

ant. 2

Χορός

αἰαῖ αἰαῖ ·

ὦ δαίμονος πολυστόνου

μοίρας τε σᾶς , γύναι .

αἰὼν δυσαίων

τις ἔλαχεν ἔλαχεν , ὅτε σʼ ἐτέκετο ματρόθεν

χιονόχρως κύκνου πτερῷ
215

Ζεὺς πρέπων διʼ αἰθέρος ·

τί γὰρ ἄπεστί σοι κακῶν ;

τίνα δὲ βίοτον οὐκ ἔτλας ;

μάτηρ μὲν οἴχεται ,

δίδυμά τε Διὸς οὐκ εὐ-
220

δαιμονεῖ τέκεα φίλα ,

χθόνα δὲ πάτριον οὐχ ὁρᾷς ,

διὰ δὲ πόλεας ἔρχεται

βάξις , ἅ σε βαρβάροισι ,

πότνια , παραδίδωσι λέχεσιν ,
225

ὁ δὲ σὸς ἐν ἁλὶ κύμασί τε λέ-

λοιπε βίοτον , οὐδέ ποτʼ ἔτι

πάτρια μέλαθρα καὶ τὰν

Χαλκίοικον ὀλβιεῖς .

ep.

Ἑλένη

φεῦ φεῦ , τίς ἢ Φρυγῶν

ἢ τίς Ἑλλανίας ἀπὸ χθονὸς
230

ἔτεμε τὰν δακρυόεσσαν

Ἰλίῳ πεύκαν ;

ἔνθεν ὀλόμενον σκάφος

συναρμόσας ὁ Πριαμίδας

ἔπλευσε βαρβάρῳ πλάτᾳ

τὰν ἐμὰν ἐφʼ ἑστίαν ,
235

ἐπὶ τὸ δυστυχέστατον

κάλλος , ὡς ἕλοι , γάμων

ἀμῶν · ἅ τε δόλιος

ἁ πολυκτόνος Κύπρις

Δαναΐδαις ἄγουσα θάνατον Πριαμίδαις ,

ὦ τάλαινα συμφορᾶς .
240

ἁ δὲ χρυσέοις θρόνοις

Διὸς ὑπαγκάλισμα σεμνὸν

Ἥρα τὸν ὠκύπουν

ἔπεμψε Μαιάδος γόνον ·

ὅς με χλοερὰ δρεπομέναν

ἔσω πέπλων ῥόδεα πέταλα ,
245

Χαλκίοικον ὡς Ἀθάναν μόλοιμʼ ,

ἀναρπάσας διʼ αἰθέρος

τάνδε γαῖαν εἰς ἄνολβον

ἔριν ἔριν τάλαιναν ἔθετο

Πριαμίδαισιν Ἑλλάδος .

τὸ δʼ ἐμὸν ὄνομα

παρὰ Σιμουντίοις ῥοαῖσι
250

μαψίδιον ἔχει φάτιν .

Helen. Euripides. Gilbert Murray. Oxford. 1913.

Tufts University provided support for entering this text.

This text was converted to electronic form by professional data entry and has been proofread to a medium level of accuracy.