Euripides Hippolytus

Gilbert Murray

Tragedy

Epic

Heatmap options Heatmap by line/paragraph

Heat options Heat by tragedy vs. epic (default) or speech vs. narrative (toggle on)

Table of Contents:

← Previous Next →

str. 1

Χορός

Ὠκεανοῦ τις ὕδωρ στάζουσα πέτρα λέγεται ,

βαπτὰν κάλπισι ῥυτὰν πα-

γὰν προιεῖσα κρημνῶν ·

ὅθι μοί τις ἦν φίλα
125

πορφύρεα φάρεα

ποταμίᾳ δρόσῳ

τέγγουσα , θερ-

μᾶς δ’ ἐπὶ νῶτα πέτρας εὐ-

αλίου κατέβαλλ’ · ὅθεν

μοι πρώτα φάτις ἦλθε δεσποίνας ·
130

ant. 1

Χορός

τειρομέναν νοσερᾷ κοίτᾳ δέμας ἐντὸς ἔχειν

οἴκων , λεπτὰ δὲ φάρη ξάν-

θαν κεφαλὰν σκιάζειν ·

τριτάταν δέ νιν κλύω
135

τάνδ’ ἀβρωσίᾳ

στόματος ἁμέραν

Δάματρος ἀ-

κτᾶς δέμας ἁγνὸν ἴσχειν , κρυ-

πτῷ πένθει θανάτου θέλου-

σαν κέλσαι ποτὶ τέρμα δύστανον .
140

str. 2

Χορός

— ἦ σὺ γ’ ἔνθεος , ὦ κούρα ,

εἴτ’ ἐκ Πανὸς εἴθ’ Ἑκάτας

ἢ σεμνῶν Κορυβάντων φοι -

τᾷς ἢ ματρὸς ὀρείας ;

— σὺ δ’ ἀμφὶ τὰν πολύθηρον Δί-
145

κτυνναν ἀμπλακίαις ἀνίε-

ρος ἀθύτων πελάνων τρύχῃ ;

φοιτᾷ γὰρ καὶ διὰ λίμνας

χέρσον θ’ ὑπὲρ πελάγους

δίναις ἐν νοτίαις ἅλμας .
150

ant. 2

Χορός

— ἢ πόσιν , τὸν Ἐρεχθειδᾶν

ἀρχαγόν , τὸν εὐπατρίδαν ,

ποιμαίνει τις ἐν οἴκοις κρυ-

πτὰ κοίτα λεχέων σῶν ;

— ἢ ναυβάτας τις ἔπλευσεν Κρή-
155

τας ἔξορμος ἀνὴρ λιμένα

τὸν εὐξεινότατον ναύταις ,

φήμαν πέμπων βασιλείᾳ ,

λύπᾳ δ’ ὑπὲρ παθέων

εὐναία δέδεται ψυχά ;
160

ep.

Χορός

— φιλεῖ δὲ τᾷ δυστρόπῳ γυναικῶν

ἁρμονίᾳ κακὰ δύστανος ἀμηχανία συνοικεῖν ,

ὠδινῶν τε καὶ ἀφροσύνας .

δι’ ἐμᾶς ᾖξέν ποτε νηδύος ἅδ’
165

αὔρα . τὰν δ’ εὔλοχον οὐρανίαν

τόξων μεδέουσαν ἀύτευν

Ἄρτεμιν , καί μοι πολυζήλωτος αἰεὶ

σὺν θεοῖσι φοιτᾷ .

Hippolytus. Euripides. Gilbert Murray. Oxford. 1902.

Tufts University provided support for entering this text.

This text was converted to electronic form by professional data entry and has been proofread to a medium level of accuracy.