Euripides Electra

Ἠλέκτρα

σύντειν ʼ — ὥρα — ποδὸς ὁρμάν · ὤ ,

ἔμβα , ἔμβα κατακλαίουσα ·

ἰώ μοί μοι .

ἐγενόμαν Ἀγαμέμνονος

115

καί μʼ ἔτεκεν Κλυταιμήστρα

στυγνὰ Τυνδάρεω κόρα ,

κικλήσκουσι δέ μʼ ἀθλίαν

Ἠλέκτραν πολιῆται .

φεῦ φεῦ σχετλίων πόνων

120

καὶ στυγερᾶς ζόας .

ὦ πάτερ , σὺ δʼ ἐν Ἀΐδα

κεῖσαι , σᾶς ἀλόχου σφαγαῖς

Αἰγίσθου τʼ , Ἀγάμεμνον .

Ἠλέκτρα

ἴθι τὸν αὐτὸν ἔγειρε γόον ,

125

ἄναγε πολύδακρυν ἁδονάν .

Ἠλέκτρα

σύντειν ʼ — ὥρα — ποδὸς ὁρμάν · ὤ ,

ἔμβα , ἔμβα , κατακλαίουσα ·

ἰώ μοί μοι .

τίνα πόλιν , τίνα δʼ οἶκον , ὦ

130

τλᾶμον σύγγονʼ , ἀλατεύεις

οἰκτρὰν ἐν θαλάμοις λιπὼν

πατρῴοις ἐπὶ συμφοραῖς

ἀλγίσταισιν ἀδελφάν ;

ἔλθοις τῶνδε πόνων ἐμοὶ

135

τᾷ μελέᾳ λυτήρ ,

ὦ Ζεῦ Ζεῦ , πατρί θʼ αἱμάτων

ἐχθίστων ἐπίκουρος , Ἄρ-

γει κέλσας πόδʼ ἀλάταν .

Ἠλέκτρα

θὲς τόδε τεῦχος ἐμῆς ἀπὸ κρατὸς ἑ-

140

λοῦσʼ , ἵνα πατρὶ γόους νυχίους

ἐπορθροβοάσω ,

ἰαχάν , Ἀΐδα μέλος ,

Ἀΐδα , πάτερ , σοι

κατὰ γᾶς ἐνέπω γόους

οἷς ἀεὶ τὸ κατʼ ἦμαρ

145

διέπομαι , κατὰ μὲν φίλαν

ὄνυχι τεμνομένα δέραν

χέρα τε κρᾶτʼ ἐπὶ κούριμον

τιθεμένα θανάτῳ σῷ .

Ἠλέκτρα

αἶ αἶ , δρύπτε κάρα ·

150

οἷα δέ τις κύκνος ἀχέτας

ποταμίοις παρὰ χεύμασιν

πατέρα φίλτατον καλεῖ ,

ὀλόμενον δολίοις βρόχων

ἕρκεσιν , ὣς σὲ τὸν ἄθλιον ,

155

πάτερ , ἐγὼ κατακλαίομαι ,

Ἠλέκτρα

λουτρὰ πανύσταθʼ ὑδρανάμενον χροῒ

κοίτᾳ ἐν οἰκτροτάτᾳ θανάτου .

ἰώ μοι , ἰώ μοι

πικρᾶς μὲν πελέκεως τομᾶς

160

σᾶς , πάτερ , πικρᾶς δʼ ἐκ

Τροΐας ὁδίου βουλᾶς ·

οὐ μίτραισι γυνή σε

δέξατʼ οὐδʼ ἐπὶ στεφάνοις ,

ξίφεσι δʼ ἀμφιτόμοις λυγρὰν

Αἰγίσθου λώβαν θεμένα

165

δόλιον ἔσχεν ἀκοίταν .

Χορός

Ἀγαμέμνονος ὦ κόρα ,

ἤλυθον , Ἠλέκτρα , ποτὶ

σὰν ἀγρότειραν αὐλάν .

ἔμολέ τις ἔμολεν γαλακτοπότας ἀνὴρ

170

Μυκηναῖος ὀρειβάτας ·

ἀγγέλλει δʼ ὅτι νῦν τριταί-

αν καρύσσουσιν θυσίαν

Ἀργεῖοι , πᾶσαι δὲ παρʼ Ἥ-

ραν μέλλουσιν παρθενικαὶ στείχειν .

Ἠλέκτρα

οὐκ ἐπʼ ἀγλαΐαις , φίλαι ,

175

θυμὸν οὐδʼ ἐπὶ χρυσέοις

ὅρμοις ἐκπεπόταμαι

τάλαινʼ , οὐδʼ ἱστᾶσα χοροὺς

Ἀργείαις ἅμα νύμφαις

εἱλικτὸν κρούσω πόδʼ ἐμόν .

180

δάκρυσι νυχεύ-

ω , δακρύων δέ μοι μέλει

δειλαίᾳ τὸ κατʼ ἦμαρ .

σκέψαι μου πιναρὰν κόμαν

καὶ τρύχη τάδʼ ἐμῶν πέπλων ,

185

εἰ πρέποντʼ Ἀγαμέμνονος

κούρᾳ ʼσται βασιλείᾳ

τᾷ Τροίᾳ θʼ , ἃ ʼμοῦ πατέρος

μέμναταί ποθʼ ἁλοῦσα .

Χορός

μεγάλα θεός · ἀλλʼ ἴθι ,

190

καὶ παρʼ ἐμοῦ χρῆσαι πολύ-

πηνα φάρεα δῦναι ,

χρύσεά τε — χαρίσαι — προσθήματʼ ἀγλαΐας .

δοκεῖς τοῖσι σοῖς δακρύοις

μὴ τιμῶσα θεούς , κρατή-

σειν ἐχθρῶν ; οὔτοι στοναχαῖς ,

195

ἀλλʼ εὐχαῖσι θεοὺς σεβί-

ζουσʼ ἕξεις εὐαμερίαν , ὦ παῖ .

Ἠλέκτρα

οὐδεὶς θεῶν ἐνοπᾶς κλύει

τᾶς δυσδαίμονος , οὐ παλαι-

ῶν πατρὸς σφαγιασμῶν .

200

οἴμοι τοῦ καταφθιμένου

τοῦ τε ζῶντος ἀλάτα ,

ὅς που γᾶν ἄλλαν κατέχει ,

μέλεος ἀλαί-

νων ποτὶ θῆσσαν ἑστίαν ,

205

τοῦ κλεινοῦ πατρὸς ἐκφύς .

αὐτὰ δʼ ἐν χερνῆσι δόμοις

ναίω ψυχὰν τακομένα

δωμάτων πατρίων φυγάς ,

οὐρείας ἀνʼ ἐρίπνας .

210

μάτηρ δʼ ἐν λέκτροις φονίοις

ἄλλῳ σύγγαμος οἰκεῖ .