Aeschylus Suppliants

Herbert Weir Smyth

Tragedy

Epic

Heatmap options Heatmap by line/paragraph

Heat options Heat by tragedy vs. epic (default) or speech vs. narrative (toggle on)

Table of Contents:

← Previous Next →

str. 1

Χορός

νῦν ὅτε καί , θεοὶ
630

διογενεῖς , κλύοιτʼ εὐ-

κταῖα γένει χεούσας ·

μήποτε πυρίφατον

γᾶν Πελασγίαν πόλιν

τὸν ἄκορον βοᾶς ,
635

κτίσαι μάχλον Ἄπη ,

τὸν ἀρότοις θερί-

ζοντα βροτοὺς ἐν ἄλλοις ,

οὕνεκʼ ᾤκτισαν ἡμᾶς ,

ψῆφον δʼ εὔφρονʼ ἔθεντο ,
640

αἰδοῦνται δʼ ἱκέτας Διός ,

ποίμναν τάνδʼ ἀμέγαρτον ·

ant. 1

Χορός

οὐδὲ μετʼ ἀρσένων

ψῆφον ἔθεντʼ ἀτιμώ-

σαντες ἔριν γυναικῶν ,
645

Δῖον ἐπιδόμενοι

πράκτορά τε σκοπὸν

δυσπολέμητον , ὃν οὐ

τίς ἂν δόμος ἔχοι

ἐπʼ ὀρόφων μιαί-
650

νοντα ; βαρὺς δʼ ἐφίζει .

ἅζονται γὰρ ὁμαίμους

Ζηνὸς ἵκτορας ἁγνοῦ .

τοιγάρτοι καθαροῖσι βω-

μοῖς θεοὺς ἀρέσονται .
655

str. 2

Χορός

τοιγὰρ ὑποσκίων

ἐκ στομάτων ποτά-

σθω φιλότιμος εὐχά ,

μήποτε λοιμὸς ἀνδρῶν

τάνδε πόλιν κενώσαι ·
660

μηδʼ ἐπιχωρίοις ἔρις

πτώμασιν αἱματίσαι πέδον γᾶς .

ἥβας δʼ ἄνθος ἄδρεπτον

ἔστω , μηδʼ Ἀφροδίτας

εὐνάτωρ βροτολοιγὸς Ἄ-
665

ρης κέρσειεν ἄωτον .

ant. 2

Χορός

καὶ γεραροῖσι πρε-

σβυτοδόκοι γεμόν-

των θυμέλαι φλεγόντων .

τὼς πόλις εὖ νέμοιτο
670

Ζῆνα μέγαν σεβόντων ,

τὸν ξένιον δʼ ὑπερτάτως ,

ὃς πολιῷ νόμῳ αἶσαν ὀρθοῖ .

τίκτεσθαι δʼ ἐφόρους γᾶς

ἄλλους εὐχόμεθʼ ἀεί ,
675

Ἄρτεμιν δʼ Ἑκάταν γυναι -

κῶν λόχους ἐφορεύειν .

str. 3

Χορός

μηδέ τις ἀνδροκμὴς

λοιγὸς ἐπελθέτω

τάνδε πόλιν δαΐζων ,
680

ἄχορον ἀκίθαριν

δακρυογόνον Ἄρη

βοάν τʼ ἔνδημον ἐξοπλίζων .

νούσων δʼ ἑσμὸς ἀπʼ ἀστῶν

ἵζοι κρατὸς ἀτερπής ·
685

εὐμενὴς δʼ ὁ Λύκειος ἔ-

στω πάσᾳ νεολαίᾳ .

ant. 3

Χορός

καρποτελῆ δέ τοι

Ζεὺς ἐπικραινέτω

φέρματι γᾶν πανώρῳ .
690

πρόνομα δὲ βότʼ ἀγροῖς

πολύγονα τελέθοι ·

τὸ πᾶν τʼ ἐκ δαιμόνων λάχοιεν .

εὔφαμον δʼ ἐπὶ βωμοῖς

μοῦσαν θείατʼ ἀοιδοί .
695

ἁγνῶν τʼ ἐκ στομάτων φερέ-

σθω φάμα φιλοφόρμιγξ .

str. 4

Χορός

φυλάσσοι τʼ ἀτρεμαῖα τιμὰς

τὸ δάμιον , τὸ πτόλιν κρατύνει ,

προμαθὶς εὐκοινόμητις ἀρχά .
700

ξένοισί τʼ εὐξυμβόλους ,

πρὶν ἐξοπλίζειν Ἄρη ,

δίκας ἄτερ πημάτων διδοῖεν .

ant. 4

Χορός

θεοὺς δʼ , οἳ γᾶν ἔχουσιν ἀεὶ

τίοιεν ἐγχωρίοις πατρῴαις
705

δαφνηφόροις βουθύτοισι τιμαῖς .

τὸ γὰρ τεκόντων σέβας

τρίτον τόδʼ ἐν θεσμίοις

Δίκας γέγραπται μεγιστοτίμου .

Suppliants. Aeschylus. Herbert Weir Smyth. New York. 1922.

Tufts University provided support for entering this text.

This text was converted to electronic form by professional data entry and has been proofread to a medium level of accuracy.