Aeschylus Suppliants

Herbert Weir Smyth

Tragedy

Epic

Heatmap options Heatmap by line/paragraph

Heat options Heat by tragedy vs. epic (default) or speech vs. narrative (toggle on)

Table of Contents:

← Previous Next →

str. 1

Χορός

ἰὼ γᾶ βοῦνι , πάνδικον σέβας ,

τί πεισόμεσθα ; ποῖ φύγωμεν Ἀπίας

χθονός , κελαινὸν εἴ τι κεῦθός ἐστί που ;

μέλας γενοίμαν καπνὸς

νέφεσσι γειτονῶν Διός ·
780

τὸ πᾶν δʼ ἄφαντος

ἀμπετὴς ἀιδνὸς ὡς

κόνις ἄτερθε πτερύγων ὀλοίμαν .

ant. 1

Χορός

ἄφυκτον δʼ οὐκέτʼ ἂν πέλοι κακόν ·

κελαινόχρως δὲ πάλλεταί μου καρδία .
785

πατρὸς σκοπαὶ δέ μʼ εἷλον · οἴχομαι φόβῳ .

θέλοιμι δʼ ἂν μορσίμου

βρόχου τυχεῖν ἐν ἀρτάναις ,

πρὶν ἄνδρʼ ἀπευκτὸν

τῷδε χριμφθῆναι χροΐ .
790

πρόπαρ θανούσας δʼ Ἀίδας ἀνάσσοι .

str. 2

Χορός

πόθεν δέ μοι γένοιτʼ ἂν αἰθέρος θρόνος ,

πρὸς ὃν νέφη μυδηλὰ γίγνεται χιών ,

ἢ λισσὰς αἰγίλιψ ἀπρόσ-

δεικτος οἰόφρων κρεμὰς
795

γυπιὰς πέτρα , βαθὺ

πτῶμα μαρτυροῦσά μοι ,

πρὶν δαΐκτορος βίᾳ

καρδίας γάμου κυρῆσαι ;

ant. 2

Χορός

κυσὶν δʼ ἔπειθʼ ἕλωρα κἀπιχωρίοις
800

ὄρνισι δεῖπνον οὐκ ἀναίνομαι πέλειν ·

τὸ γὰρ θανεῖν ἐλευθεροῦ-

ται φιλαιάκτων κακῶν . ἐλθέτω

ἐλθέτω μόρος , πρὸ κοί-

τας γαμηλίου τυχών .
805

ἀμφυγᾶς τίνʼ ἔτι πόρον

τέμνω γάμου λυτῆρα ;

str. 3

Χορός

ἴυζε δʼ ὀμφὰν οὐρανίαν

μέλεα μέλη λιτανὰ θεοῖς ·

τέλεα δέ πως πελόμενά μοι
810

λύσιμά τʼ ἄχιμά τʼ ἔπιδε , πάτερ ,

βίαια μὴ φαιδρῶς ὁρῶν

ὄμμασιν ἐνδίκοις .

σεβίζου δʼ ἱκέτας σέθεν ,
815

γαιάοχε παγκρατὲς Ζεῦ .

ant. 3

Χορός

γένος γὰρ Αἰγύπτειον ὕβριν

δύσφορον ἀρσενογενὲς

μετά με δρόμοισι διόμενοι

φυγάδα μάταισι πολυθρόοις
820

βίαια δίζηνται λαβεῖν .

σὸν δʼ ἐπίπαν ζυγὸν

ταλάντου . τί δʼ ἄνευ σέθεν

θνατοῖσι τέλειόν ἐστιν ;

Suppliants. Aeschylus. Herbert Weir Smyth. New York. 1922.

Tufts University provided support for entering this text.

This text was converted to electronic form by professional data entry and has been proofread to a medium level of accuracy.