Sophocles Antigone

Francis Storr

Tragedy

Epic

Heatmap options Heatmap by line/paragraph

Heat options Heat by tragedy vs. epic (default) or speech vs. narrative (toggle on)

Table of Contents:

← Previous Next →

str. 1

Ἀντιγόνη

ὁρᾶτʼ ἔμʼ , ὦ γᾶς πατρίας πολῖται , τὰν νεάταν ὁδὸν

στείχουσαν , νέατον δὲ φέγγος λεύσσουσαν ἀελίου ,

κοὔποτʼ αὖθις . ἀλλά μʼ ὁ παγκοίτας Ἅιδας ζῶσαν ἄγει
810

τὰν Ἀχέροντος

ἀκτάν , οὔθʼ ὑμεναίων ἔγκληρον , οὔτʼ ἐπινύμφειός

πώ μέ τις ὕμνος ὕμνησεν , ἀλλʼ Ἀχέροντι νυμφεύσω .
815

Χορός

οὐκοῦν κλεινὴ καὶ ἔπαινον ἔχουσʼ

ἐς τόδʼ ἀπέρχει κεῦθος νεκύων ,

οὔτε φθινάσιν πληγεῖσα νόσοις

οὔτε ξιφέων ἐπίχειρα λαχοῦσʼ ,
820

ἀλλʼ αὐτόνομος ζῶσα μόνη δὴ

θνητῶν Ἅιδην καταβήσει .

ant. 1

Ἀντιγόνη

ἤκουσα δὴ λυγροτάταν ὀλέσθαι τὰν Φρυγίαν ξέναν

Ταντάλου Σιπύλῳ πρὸς ἄκρῳ , τὰν κισσὸς ὡς ἀτενὴς
825

πετραία βλάστα δάμασεν , καί νιν ὄμβροι τακομέναν ,

ὡς φάτις ἀνδρῶν ,

χιών τʼ οὐδαμὰ λείπει , τέγγει δʼ ὑπʼ ὀφρύσι παγκλαύτοις
830

δειράδας · ᾇ με δαίμων ὁμοιοτάταν κατευνάζει .

Χορός

ἀλλὰ θεός τοι καὶ θεογεννής ,

ἡμεῖς δὲ βροτοὶ καὶ θνητογενεῖς .
835

καίτοι φθιμένῃ μέγα κἀκοῦσαι

τοῖς ἰσοθέοις σύγκληρα λαχεῖν .

ζῶσαν καὶ ἔπειτα θανοῦσαν .

str. 2

Ἀντιγόνη

οἴμοι γελῶμαι . τί με , πρὸς θεῶν πατρῴων .

οὐκ οἰχομέναν ὑβρίζεις , ἀλλʼ ἐπίφαντον ;
840

ὦ πόλις , ὦ πόλεως πολυκτήμονες ἄνδρες ·

ἰὼ Διρκαῖαι κρῆναι

Θήβας τʼ εὐαρμάτου ἄλσος , ἔμπας ξυμμάρτυρας ὔμμʼ ἐπικτῶμαι ,
845

οἵα φίλων ἄκλαυτος , οἵοις νόμοις

πρὸς ἕργμα τυμβόχωστον ἔρχομαι τάφου ποταινίου ·

ἰὼ δύστανος , βροτοῖς οὔτε νεκροῖς κυροῦσα
850

μέτοικος οὐ ζῶσιν , οὐ θανοῦσιν .

str. 3

Χορός

προβᾶσʼ ἐπʼ ἔσχατον θράσους

ὑψηλὸν ἐς Δίκας βάθρον

προσέπεσες , ὦ τέκνον , πολύ ·
855

πατρῷον δʼ ἐκτίνεις τινʼ ἆθλον .

ant. 2

Ἀντιγόνη

ἔψαυσας ἀλγεινοτάτας ἐμοὶ μερίμνας ,

πατρὸς τριπόλιστον οἶκτον τοῦ τε πρόπαντος

ἁμετέρου πότμου κλεινοῖς Λαβδακίδαισιν .
860

ἰὼ ματρῷαι λέκτρων

ἆται κοιμήματά τʼ αὐτογέννητʼ ἐμῷ πατρὶ δυσμόρου ματρός ,
865

οἵων ἐγώ ποθʼ ἁ ταλαίφρων ἔφυν ·

πρὸς οὓς ἀραῖος ἄγαμος ἅδʼ ἐγὼ μέτοικος ἔρχομαι .

ἰὼ δυσπότμων κασίγνητε γάμων κυρήσας ,
870

θανὼν ἔτʼ οὖσαν κατήναρές με .

ant. 3

Χορός

σέβειν μὲν εὐσέβειά τις ,

κράτος δʼ ὅτῳ κράτος μέλει

παραβατὸν οὐδαμᾷ πέλει ·

σὲ δʼ αὐτόγνωτος ὤλεσʼ ὀργά .
875

Ἀντιγόνη

ἄκλαυτος , ἄφιλος , ἀνυμέναιος ταλαίφρων ἄγομαι

τὰν πυμάταν ὁδόν . οὐκέτι μοι τόδε

λαμπάδος ἱερὸν ὄμμα

θέμις ὁρᾶν ταλαίνᾳ .
880

τὸν δʼ ἐμὸν πότμον ἀδάκρυτον

οὐδεὶς φίλων στενάζει .

Antigone. Sophocles. Francis Storr. London. 1912.

Tufts University provided support for entering this text.

This text was converted to electronic form by professional data entry and has been proofread to a medium level of accuracy.