Aeschylus Agamemnon

Herbert Weir Smyth

Tragedy

Epic

Heatmap options Heatmap by line/paragraph

Heat options Heat by tragedy vs. epic (default) or speech vs. narrative (toggle on)

Table of Contents:

← Previous Next →

str. 1

Χορός

κύριός εἰμι θροεῖν ὅδιον κράτος αἴσιον ἀνδρῶν

ἐκτελέων · ἔτι γὰρ θεόθεν καταπνεύει
105

πειθὼ μολπᾶν

ἀλκὰν σύμφυτος αἰών ·

ὅπως Ἀχαι-

ῶν δίθρονον κράτος , Ἑλλάδος ἥβας

ξύμφρονα ταγάν ,
110

πέμπει σὺν δορὶ καὶ χερὶ πράκτορι

θούριος ὄρνις Τευκρίδʼ ἐπʼ αἶαν ,

οἰωνῶν βασιλεὺς βασιλεῦσι νε-

ῶν ὁ κελαινός , ὅ τʼ ἐξόπιν ἀργᾶς ,
115

φανέντες ἴ-

κταρ μελάθρων χερὸς ἐκ δοριπάλτου

παμπρέπτοις ἐν ἕδραισιν ,

βοσκόμενοι λαγίναν , ἐρικύμονα φέρματι γένναν ,

βλαβέντα λοισθίων δρόμων .
120

αἴλινον αἴλινον εἰπέ , τὸ δʼ εὖ νικάτω .

ant. 1

Χορός

κεδνὸς δὲ στρατόμαντις ἰδὼν δύο λήμασι δισσοὺς

Ἀτρεΐδας μαχίμους ἐδάη λαγοδαίτας

πομπούς τʼ ἀρχάς ·

οὕτω δʼ εἶπε τερᾴζων ·
125

χρόνῳ μὲν ἀγρεῖ

Πριάμου πόλιν ἅδε κέλευθος ,

πάντα δὲ πύργων

κτήνη πρόσθε τὰ δημιοπληθῆ

Μοῖρʼ ἀλαπάξει πρὸς τὸ βίαιον ·
130

οἶον μή τις ἄγα θεόθεν κνεφά -

σῃ προτυπὲν στόμιον μέγα Τροίας

στρατωθέν . οἴκτῳ γὰρ ἐπί-

φθονος Ἄρτεμις ἁγνὰ
135

πτανοῖσιν κυσὶ πατρὸς

αὐτότοκον πρὸ λόχου μογερὰν πτάκα θυομένοισιν

στυγεῖ δὲ δεῖπνον αἰετῶν .

αἴλινον αἴλινον εἰπέ , τὸ δʼ εὖ νικάτω .

ep.

Χορός

τόσον περ εὔφρων , καλά ,
140

δρόσοισι λεπτοῖς μαλερῶν λεόντων

πάντων τʼ ἀγρονόμων φιλομάστοις

θηρῶν ὀβρικάλοισι τερπνά ,

τούτων αἴνει ξύμβολα κρᾶναι ,

δεξιὰ μέν , κατάμομφα δὲ φάσματα στρουθῶν .
145

ἰήιον δὲ καλέω Παιᾶνα ,

μή τινας ἀντιπνόους Δανα-

οῖς χρονίας ἐχενῇδας ἀ-

πλοίας τεύξῃ ,
150

σπευδομένα θυσίαν ἑτέραν ἄνομόν τινʼ , ἄδαιτον

νεικέων τέκτονα σύμφυτον ,

οὐ δεισήνορα . μίμνει γὰρ φοβερὰ παλίνορτος

οἰκονόμος δολία μνάμων μῆνις τεκνόποινος .
155

τοιάδε Κάλχας ξὺν μεγάλοις ἀγαθοῖς ἀπέκλαγξεν

μόρσιμʼ ἀπʼ ὀρνίθων ὁδίων οἴκοις βασιλείοις ·

τοῖς δʼ ὁμόφωνον

αἴλινον αἴλινον εἰπέ , τὸ δʼ εὖ νικάτω .

str. 2

Χορός

Ζεύς , ὅστις ποτʼ ἐστίν , εἰ τόδʼ αὐ-
160

τῷ φίλον κεκλημένῳ ,

τοῦτό νιν προσεννέπω .

οὐκ ἔχω προσεικάσαι

πάντʼ ἐπισταθμώμενος

πλὴν Διός , εἰ τὸ μάταν ἀπὸ φροντίδος ἄχθος
165

χρὴ βαλεῖν ἐτητύμως .

ant. 2

Χορός

οὐδʼ ὅστις πάροιθεν ἦν μέγας ,

παμμάχῳ θράσει βρύων ,

οὐδὲ λέξεται πρὶν ὤν ·
170

ὃς δʼ ἔπειτʼ ἔφυ , τρια-

κτῆρος οἴχεται τυχών .

Ζῆνα δέ τις προφρόνως ἐπινίκια κλάζων

τεύξεται φρενῶν τὸ πᾶν ·
175

str. 3

Χορός

τὸν φρονεῖν βροτοὺς ὁδώ-

σαντα , τὸν πάθει μάθος

θέντα κυρίως ἔχειν .

στάζει δʼ ἔν θʼ ὕπνῳ πρὸ καρδίας

μνησιπήμων πόνος · καὶ παρʼ ἄ-
180

κοντας ἦλθε σωφρονεῖν .

δαιμόνων δέ που χάρις βίαιος

σέλμα σεμνὸν ἡμένων .

ant. 3

Χορός

καὶ τόθʼ ἡγεμὼν ὁ πρέ-

σβυς νεῶν Ἀχαιικῶν ,
185

μάντιν οὔτινα ψέγων ,

ἐμπαίοις τύχαισι συμπνέων ,

εὖτʼ ἀπλοίᾳ κεναγγεῖ βαρύ-

νοντʼ Ἀχαιικὸς λεώς ,

Χαλκίδος πέραν ἔχων παλιρρόχ-
190

θοις ἐν Αὐλίδος τόποις ·

str. 4

Χορός

πνοαὶ δʼ ἀπὸ Στρυμόνος μολοῦσαι

κακόσχολοι νήστιδες δύσορμοι ,

βροτῶν ἄλαι , ναῶν τε καὶ

πεισμάτων ἀφειδεῖς ,
195

παλιμμήκη χρόνον τιθεῖσαι

τρίβῳ κατέξαινον ἄν-

θος Ἀργείων · ἐπεὶ δὲ καὶ πικροῦ

χείματος ἄλλο μῆχαρ

βριθύτερον πρόμοισιν
200

μάντις ἔκλαγξεν προφέρων

Ἄρτεμιν , ὥστε χθόνα βάκ-

τροις ἐπικρούσαντας Ἀτρεί-

δας δάκρυ μὴ κατασχεῖν ·

ant. 4

Χορός

ἄναξ δʼ ὁ πρέσβυς τότʼ εἶπε φωνῶν ·
205

βαρεῖα μὲν κὴρ τὸ μὴ πιθέσθαι ,

βαρεῖα δʼ , εἰ τέκνον δαΐ-

ξω , δόμων ἄγαλμα ,

μιαίνων παρθενοσφάγοισιν

ῥείθροις πατρῴους χέρας
210

πέλας βωμοῦ · τί τῶνδʼ ἄνευ κακῶν ,

πῶς λιπόναυς γένωμαι

ξυμμαχίας ἁμαρτών ;

παυσανέμου γὰρ θυσίας

παρθενίου θʼ αἵματος ὀρ-
215

γᾷ περιόργως ἐπιθυ-

μεῖν θέμις . εὖ γὰρ εἴη .

str. 5

Χορός

ἐπεὶ δʼ ἀνάγκας ἔδυ λέπαδνον

φρενὸς πνέων δυσσεβῆ τροπαίαν

ἄναγνον ἀνίερον , τόθεν
220

τὸ παντότολμον φρονεῖν μετέγνω .

βροτοὺς θρασύνει γὰρ αἰσχρόμητις

τάλαινα παρακοπὰ πρωτοπήμων . ἔτλα δʼ οὖν

θυτὴρ γενέσθαι θυγατρός ,
225

γυναικοποίνων πολέμων ἀρωγὰν

καὶ προτέλεια ναῶν .

ant. 5

Χορός

λιτὰς δὲ καὶ κληδόνας πατρῴους

παρʼ οὐδὲν αἰῶ τε παρθένειον

ἔθεντο φιλόμαχοι βραβῆς .
230

φράσεν δʼ ἀόζοις πατὴρ μετʼ εὐχὰν

δίκαν χιμαίρας ὕπερθε βωμοῦ

πέπλοισι περιπετῆ παντὶ θυμῷ προνωπῆ

λαβεῖν ἀέρδην , στόματός
235

τε καλλιπρῴρου φυλακᾷ κατασχεῖν

φθόγγον ἀραῖον οἴκοις ,

str. 6

Χορός

βίᾳ χαλινῶν τʼ ἀναύδῳ μένει .

κρόκου βαφὰς δʼ ἐς πέδον χέουσα

ἔβαλλʼ ἕκαστον θυτήρ -
240

ων ἀπʼ ὄμματος βέλει

φιλοίκτῳ , πρέπουσά θʼ ὡς ἐν γραφαῖς , προσεννέπειν

θέλουσʼ , ἐπεὶ πολλάκις

πατρὸς κατʼ ἀνδρῶνας εὐτραπέζους

ἔμελψεν , ἁγνᾷ δʼ ἀταύρωτος αὐδᾷ πατρὸς
245

φίλου τριτόσπονδον εὔ-

ποτμον παιῶνα φίλως ἐτίμα —

ant. 6

Χορός

τὰ δʼ ἔνθεν οὔτʼ εἶδον οὔτʼ ἐννέπω ·

τέχναι δὲ Κάλχαντος οὐκ ἄκραντοι .

Δίκα δὲ τοῖς μὲν παθοῦσ-
250

ιν μαθεῖν ἐπιρρέπει ·

τὸ μέλλον δʼ , ἐπεὶ γένοιτʼ , ἂν κλύοις · πρὸ χαιρέτω ·

ἴσον δὲ τῷ προστένειν .

τορὸν γὰρ ἥξει σύνορθρον αὐγαῖς .

πέλοιτο δʼ οὖν τἀπὶ τούτοισιν εὖ πρᾶξις , ὡς
255

θέλει τόδʼ ἄγχιστον Ἀ-

πίας γαίας μονόφρουρον ἕρκος .

Agamemnon. Aeschylus. Herbert Weir Smyth. New York. 1926.

Tufts University provided support for entering this text.

This text was converted to electronic form by professional data entry and has been proofread to a medium level of accuracy.