Aeschylus Agamemnon

Herbert Weir Smyth

Tragedy

Epic

Table of Contents:

← Previous Next →

str. 1

Χορός

τίς ποτʼ ὠνόμαζεν ὧδʼ

ἐς τὸ πᾶν ἐτητύμως—

μή τις ὅντινʼ οὐχ ὁρῶμεν προνοί-

αισι τοῦ πεπρωμένου

γλῶσσαν ἐν τύχᾳ νέμων;—
685

τὰν δορίγαμβρον ἀμφινει-

κῆ θʼ Ἑλέναν; ἐπεὶ πρεπόντως

ἑλένας, ἕλανδρος, ἑλέ-

πτολις, ἐκ τῶν ἁβροτίμων
690

προκαλυμμάτων ἔπλευσε

ζεφύρου γίγαντος αὔρᾳ,

πολύανδροί τε φεράσπιδες κυναγοὶ

κατʼ ἴχνος πλατᾶν ἄφαντον
695

κελσάντων Σιμόεντος ἀ-

κτὰς ἐπʼ ἀεξιφύλλους

διʼ ἔριν αἱματόεσσαν.

ant. 1

Χορός

Ἰλίῳ δὲ κῆδος ὀρθ-

ώνυμον τελεσσίφρων
700

μῆνις ἤλασεν, τραπέζας ἀτί-

μωσιν ὑστέρῳ χρόνῳ

καὶ ξυνεστίου Διὸς

πρασσομένα τὸ νυμφότι-

μον μέλος ἐκφάτως τίοντας,

ὑμέναιον, ὃς τότʼ ἐπέρ-

ρεπεν γαμβροῖσιν ἀείδειν·

μεταμανθάνουσα δʼ ὕμνον

Πριάμου πόλις γεραιὰ
710

πολύθρηνον μέγα που στένει κικλήσκου-

σα Πάριν τὸν αἰνόλεκτρον,

παμπορθῆ πολύθρηνον

αἰῶνα διαὶ πολιτᾶν

μέλεον αἷμʼ ἀνατλᾶσα.
715

str. 2

Χορός

ἔθρεψεν δὲ λέοντος ἶ-

νιν δόμοις ἀγάλακτον οὕ-

τως ἀνὴρ φιλόμαστον,

ἐν βιότου προτελείοις
720

ἅμερον, εὐφιλόπαιδα

καὶ γεραροῖς ἐπίχαρτον.

πολέα δʼ ἔσχʼ ἐν ἀγκάλαις

νεοτρόφου τέκνου δίκαν,

φαιδρωπὸς ποτὶ χεῖρα σαί-
725

νων τε γαστρὸς ἀνάγκαις.

ant. 2

Χορός

χρονισθεὶς δʼ ἀπέδειξεν ἦ-

θος τὸ πρὸς τοκέων· χάριν

γὰρ τροφεῦσιν ἀμείβων

μηλοφόνοισιν ἐν ἄταις
730

δαῖτʼ ἀκέλευστος ἔτευξεν·

αἵματι δʼ οἶκος ἐφύρθη,

ἄμαχον ἄλγος οἰκέταις

μέγα σίνος πολυκτόνον.

ἐκ θεοῦ δʼ ἱερεύς τις ἄ-
735

τας δόμοις προσεθρέφθη.

str. 3

Χορός

πάραυτα δʼ ἐλθεῖν ἐς Ἰλίου πόλιν

λέγοιμʼ ἂν φρόνημα μὲν

νηνέμου γαλάνας,

ἀκασκαῖον δʼ ἄγαλμα πλούτου,
740

μαλθακὸν ὀμμάτων βέλος,

δηξίθυμον ἔρωτος ἄνθος.

παρακλίνασʼ ἐπέκρανεν

δὲ γάμου πικρὰς τελευτάς,
745

δύσεδρος καὶ δυσόμιλος

συμένα Πριαμίδαισιν,

πομπᾷ Διὸς ξενίου,

νυμφόκλαυτος Ἐρινύς.

ant. 3

Χορός

παλαίφατος δʼ ἐν βροτοῖς γέρων λόγος
750

τέτυκται, μέγαν τελε-

σθέντα φωτὸς ὄλβον

τεκνοῦσθαι μηδʼ ἄπαιδα θνῄσκειν,

ἐκ δʼ ἀγαθᾶς τύχας γένει
755

βλαστάνειν ἀκόρεστον οἰζύν.

δίχα δʼ ἄλλων μονόφρων εἰ-

μί· τὸ δυσσεβὲς γὰρ ἔργον

μετὰ μὲν πλείονα τίκτει,

σφετέρᾳ δʼ εἰκότα γέννᾳ.
760

οἴκων δʼ ἄρʼ εὐθυδίκων

καλλίπαις πότμος αἰεί.

str. 4

Χορός

φιλεῖ δὲ τίκτειν Ὕβρις

μὲν παλαιὰ νεά-

ζουσαν ἐν κακοῖς βροτῶν
765

ὕβριν τότʼ ἢ τόθʼ, ὅτε τὸ κύρ-

ιον μόλῃ φάος τόκου,

δαίμονά τε τὰν ἄμαχον ἀπόλεμ-

ον, ἀνίερον Θράσος, μελαί-

νας μελάθροισιν Ἄτας,
770

εἰδομένας τοκεῦσιν.

ant. 4

Χορός

Δίκα δὲ λάμπει μὲν ἐν

δυσκάπνοις δώμασιν,

τὸν δʼ ἐναίσιμον τίει βίον.
775

τὰ χρυσόπαστα δʼ ἔδεθλα σὺν

πίνῳ χερῶν παλιντρόποις

ὄμμασι λιποῦσʼ, ὅσια προσέμολ-

ε, δύναμιν οὐ σέβουσα πλού-

του παράσημον αἴνῳ·
780

πᾶν δʼ ἐπὶ τέρμα νωμᾷ.

Agamemnon. Aeschylus. Herbert Weir Smyth. New York. 1926.

Tufts University provided support for entering this text.

This text was converted to electronic form by professional data entry and has been proofread to a medium level of accuracy.