Aeschylus Agamemnon

Herbert Weir Smyth

Tragedy

Epic

Heatmap options Heatmap by line/paragraph

Heat options Heat by tragedy vs. epic (default) or speech vs. narrative (toggle on)

Table of Contents:

← Previous Next →

str. 1

Χορός

φεῦ , τίς ἂν ἐν τάχει , μὴ περιώδυνος ,

μηδὲ δεμνιοτήρης ,

μόλοι τὸν αἰεὶ φέρουσʼ ἐν ἡμῖν
1450

Μοῖρʼ ἀτέλευτον ὕπνον , δαμέντος

φύλακος εὐμενεστάτου καὶ

πολλὰ τλάντος γυναικὸς διαί ·

πρὸς γυναικὸς δʼ ἀπέφθισεν βίον .

Χορός

ἰὼ ἰὼ παράνους Ἑλένα
1455

μία τὰς πολλάς , τάς πάνυ πολλὰς

ψυχὰς ὀλέσασʼ ὑπὸ Τροίᾳ .

νῦν δὲ τελέαν πολύμναστον ἐπηνθίσω

διʼ αἷμʼ ἄνιπτον . ἦ τις ἦν τότʼ ἐν δόμοις
1460

ἔρις ἐρίδματος ἀνδρὸς οἰζύς .

Κλυταιμήστρα

μηδὲν θανάτου μοῖραν ἐπεύχου

τοῖσδε βαρυνθείς ·

μηδʼ εἰς Ἑλένην κότον ἐκτρέψῃς ,

ὡς ἀνδρολέτειρʼ , ὡς μία πολλῶν
1465

ἀνδρῶν ψυχὰς Δαναῶν ὀλέσασʼ

ἀξύστατον ἄλγος ἔπραξεν .

ant. 1

Χορός

δαῖμον , ὃς ἐμπίτνεις δώμασι καὶ διφυί-

οισι Τανταλίδαισιν ,

κράτος τʼ ἰσόψυχον ἐκ γυναικῶν
1470

καρδιόδηκτον ἐμοὶ κρατύνεις .

ἐπὶ δὲ σώματος δίκαν μοι

κόρακος ἐχθροῦ σταθεῖσʼ ἐκνόμως

ὕμνον ὑμνεῖν ἐπεύχεται ˘¯

Κλυταιμήστρα

νῦν δʼ ὤρθωσας στόματος γνώμην ,
1475

τὸν τριπάχυντον

δαίμονα γέννης τῆσδε κικλήσκων .

ἐκ τοῦ γὰρ ἔρως αἱματολοιχὸς

νείρᾳ τρέφεται , πρὶν καταλῆξαι

τὸ παλαιὸν ἄχος , νέος ἰχώρ .
1480

str. 2

Χορός

ἦ μέγαν οἰκονόμον

δαίμονα καὶ βαρύμηνιν αἰνεῖς ,

φεῦ φεῦ , κακὸν αἶνον ἀτη-

ρᾶς τύχας ἀκορέστου ·

ἰὴ ἰή , διαὶ Διὸς
1485

παναιτίου πανεργέτα ·

τί γὰρ βροτοῖς ἄνευ Διὸς τελεῖται ;

τί τῶνδʼ οὐ θεόκραντόν ἐστιν ;

Χορός

ἰὼ ἰὼ βασιλεῦ βασιλεῦ ,

πῶς σε δακρύσω ;
1490

φρενὸς ἐκ φιλίας τί ποτʼ εἴπω ;

κεῖσαι δʼ ἀράχνης ἐν ὑφάσματι τῷδʼ

ἀσεβεῖ θανάτῳ βίον ἐκπνέων .

ὤμοι μοι κοίταν τάνδʼ ἀνελεύθερον

δολίῳ μόρῳ δαμεὶς δάμαρτος
1495

ἐκ χερὸς ἀμφιτόμῳ βελέμνῳ .

Κλυταιμήστρα

αὐχεῖς εἶναι τόδε τοὔργον ἐμόν ;

μηδʼ ἐπιλεχθῇς

Ἀγαμεμνονίαν εἶναί μʼ ἄλοχον .

φανταζόμενος δὲ γυναικὶ νεκροῦ
1500

τοῦδʼ ὁ παλαιὸς δριμὺς ἀλάστωρ

Ἀτρέως χαλεποῦ θοινατῆρος

τόνδʼ ἀπέτεισεν ,

τέλεον νεαροῖς ἐπιθύσας .

ant. 2

Χορός

ὡς μὲν ἀναίτιος εἶ
1505

τοῦδε φόνου τίς ὁ μαρτυρήσων ;

πῶς πῶς ; πατρόθεν δὲ συλλή-

πτωρ γένοιτʼ ἂν ἀλάστωρ .

βιάζεται δʼ ὁμοσπόροις

ἐπιρροαῖσιν αἱμάτων
1510

μέλας Ἄρης , ὅποι δίκαν προβαίνων

πάχνᾳ κουροβόρῳ παρέξει .

Χορός

ἰὼ ἰὼ βασιλεῦ βασιλεῦ ,

πῶς σε δακρύσω ;

φρενὸς ἐκ φιλίας τί ποτʼ εἴπω ;
1515

κεῖσαι δʼ ἀράχνης ἐν ὑφάσματι τῷδʼ

ἀσεβεῖ θανάτῳ βίον ἐκπνέων .

ὤμοι μοι κοίταν τάνδʼ ἀνελεύθερον

δολίῳ μόρῳ δαμεὶς

ἐκ χερὸς ἀμφιτόμῳ βελέμνῳ .
1520

Κλυταιμήστρα

οὔτʼ ἀνελεύθερον οἶμαι θάνατον

τῷδε γενέσθαι .

οὐδὲ γὰρ οὗτος δολίαν ἄτην

οἴκοισιν ἔθηκʼ ;

ἀλλʼ ἐμὸν ἐκ τοῦδʼ ἔρνος ἀερθέν .
1525

τὴν πολυκλαύτην Ἰφιγενείαν ,

ἄξια δράσας ἄξια πάσχων

μηδὲν ἐν Ἅιδου μεγαλαυχείτω ,

ξιφοδηλήτῳ ,

θανάτῳ τείσας ἅπερ ἦρξεν .

str. 3

Χορός

ἀμηχανῶ φροντίδος στερηθεὶς
1530

εὐπάλαμον μέριμναν

ὅπα τράπωμαι , πίτνοντος οἴκου .

δέδοικα δʼ ὄμβρου κτύπον δομοσφαλῆ

τὸν αἱματηρόν · ψακὰς δὲ λήγει .

δίκην δʼ ἐπʼ ἄλλο πρᾶγμα θηγάνει βλάβης
1535

πρὸς ἄλλαις θηγάναισι μοῖρα .

Χορός

ἰὼ γᾶ γᾶ , εἴθʼ ἔμʼ ἐδέξω ,

πρὶν τόνδʼ ἐπιδεῖν ἀργυροτοίχου

δροίτης κατέχοντα χάμευναν .
1540

τίς ὁ θάψων νιν ; τίς ὁ θρηνήσων ;

ἦ σὺ τόδʼ ἔρξαι τλήσῃ , κτείνασʼ

ἄνδρα τὸν αὑτῆς ἀποκωκῦσαι

ψυχῇ τʼ ἄχαριν χάριν ἀντʼ ἔργων
1545

μεγάλων ἀδίκως ἐπικρᾶναι ;

τίς δʼ ἐπιτύμβιον αἶνον ἐπʼ ἀνδρὶ θείῳ

σὺν δακρύοις ἰάπτων

ἀληθείᾳ φρενῶν πονήσει ;
1550

Κλυταιμήστρα

οὐ σὲ προσήκει τὸ μέλημʼ ἀλέγειν

τοῦτο · πρὸς ἡμῶν

κάππεσε , κάτθανε , καὶ καταθάψομεν ,

οὐχ ὑπὸ κλαυθμῶν τῶν ἐξ οἴκων ,

ἀλλʼ Ἰφιγένειά νιν ἀσπασίως
1555

θυγάτηρ , ὡς χρή ,

πατέρʼ ἀντιάσασα πρὸς ὠκύπορον

πόρθμευμʼ ἀχέων

περὶ χεῖρε βαλοῦσα φιλήσει .

ant. 3

Χορός

ὄνειδος ἥκει τόδʼ ἀντʼ ὀνείδους .
1560

δύσμαχα δʼ ἔστι κρῖναι .

φέρει φέροντʼ , ἐκτίνει δʼ ὁ καίνων .

μίμνει δὲ μίμνοντος ἐν θρόνῳ Διὸς

παθεῖν τὸν ἔρξαντα · θέσμιον γάρ .

τίς ἂν γονὰν ἀραῖον ἐκβάλοι δόμων ;
1565

κεκόλληται γένος πρὸς ἄτᾳ .

Κλυταιμήστρα

ἐς τόνδʼ ἐνέβης ξὺν ἀληθείᾳ

χρησμόν . ἐγὼ δʼ οὖν

ἐθέλω δαίμονι τῷ Πλεισθενιδῶν

ὅρκους θεμένη τάδε μὲν στέργειν ,
1570

δύστλητά περ ὄνθʼ · ὃ δὲ λοιπόν , ἰόντʼ

ἐκ τῶνδε δόμων ἄλλην γενεὰν

τρίβειν θανάτοις αὐθένταισι .

κτεάνων τε μέρος

βαιὸν ἐχούσῃ πᾶν ἀπόχρη μοι

μανίας μελάθρων

ἀλληλοφόνους ἀφελούσῃ .

Agamemnon. Aeschylus. Herbert Weir Smyth. New York. 1926.

Tufts University provided support for entering this text.

This text was converted to electronic form by professional data entry and has been proofread to a medium level of accuracy.