‘ἐπειδὴ πάντως ὁρῶ ὑμᾶς , ὦ Ἀθηναῖοι , ὡρμημένους στρατεύειν , ξυνενέγκοι μὲν ταῦτα ὡς βουλόμεθα , ἐπὶ δὲ τῷ παρόντι ἃ γιγνώσκω σημανῶ .
ἐπὶ γὰρ πόλεις , ὡς ἐγὼ ἀκοῇ αἰσθάνομαι , μέλλομεν ἰέναι μεγάλας καὶ οὔθ’ ὑπηκόους ἀλλήλων οὔτε δεομένας μεταβολῆς , ᾗ ἂν ἐκ βιαίου τις δουλείας ἄσμενος ἐς ῥᾴω μετάστασιν χωροίη , οὐδ’ ἂν τὴν ἀρχὴν τὴν ἡμετέραν εἰκότως ἀντ’ ἐλευθερίας προσδεξαμένας , τό τε πλῆθος ὡς ἐν μιᾷ νήσῳ πολλὰς τὰς Ἑλληνίδας .
πλὴν γὰρ Νάξου καὶ Κατάνης , ἃς ἐλπίζω ἡμῖν κατὰ τὸ Λεοντίνων ξυγγενὲς προσέσεσθαι , ἄλλαι εἰσὶν ἑπτά , καὶ παρεσκευασμέναι τοῖς πᾶσιν ὁμοιοτρόπως μάλιστα τῇ ἡμετέρᾳ δυνάμει , καὶ οὐχ ἥκιστα ἐπὶ ἃς μᾶλλον πλέομεν , Σελινοῦς καὶ Συράκουσαι .
πολλοὶ μὲν γὰρ ὁπλῖται ἔνεισι καὶ τοξόται καὶ ἀκοντισταί , πολλαὶ δὲ τριήρεις καὶ ὄχλος ὁ πληρώσων αὐτάς . χρήματά τ’ ἔχουσι τὰ μὲν ἴδια , τὰ δὲ καὶ ἐν τοῖς ἱεροῖς ἐστὶ Σελινουντίοις , Συρακοσίοις δὲ καὶ ἀπὸ βαρβάρων τινῶν ἀπαρχὴ ἐσφέρεται · ᾧ δὲ μάλιστα ἡμῶν προύχουσιν , ἵππους τε πολλοὺς κέκτηνται καὶ σίτῳ οἰκείῳ καὶ οὐκ ἐπακτῷ χρῶνται .
Historiae. Thucydides. Henry Stuart Jones. Oxford. 1910.
Tufts University provided support for entering this text.
This text was converted to electronic form by professional data entry and has been proofread to a medium level of accuracy.