ἐπὶ δὲ Σάμον στρατεύματος ναυτικοῦ οἰχομένου Βαβυλώνιοι ἀπέστησαν , κάρτα εὖ παρεσκευασμένοι · ἐν ὅσῳ γὰρ ὅ τε Μάγος ἦρχε καὶ οἱ ἑπτὰ ἐπανέστησαν , ἐν τούτῳ παντὶ τῷ χρόνῳ καὶ τῇ ταραχῇ ἐς τὴν πολιορκίην παρεσκευάζοντο .
καί κως ταῦτα ποιεῦντες ἐλάνθανον . ἐπείτε δὲ ἐκ τοῦ ἐμφανέος ἀπέστησαν , ἐποίησαν τοιόνδε · τὰς μητέρας ἐξελόντες , γυναῖκα ἕκαστος μίαν προσεξαιρέετο τὴν ἐβούλετο ἐκ τῶν ἑωυτοῦ οἰκίων , τὰς δὲ λοιπὰς ἁπάσας συναγαγόντες ἀπέπνιξαν · τὴν δὲ μίαν ἕκαστος σιτοποιὸν ἐξαιρέετο · ἀπέπνιξαν δὲ αὐτάς , ἵνα μή σφεων τὸν σῖτον ἀναισιμώσωσι .
History. Herodotus. A.D. Godley. Cambridge. 1920-1925.
Tufts University provided support for entering this text.
This text was converted to electronic form by professional data entry and has been proofread to a medium level of accuracy.