νόμοισι δὲ Ἰσσηδόνες τοῖσιδε λέγονται χρᾶσθαι . ἐπεὰν ἀνδρὶ ἀποθάνῃ πατήρ , οἱ προσήκοντες πάντες προσάγουσι πρόβατα , καὶ ἔπειτα ταῦτα θύσαντες καὶ καταταμόντες τὰ κρέα κατατάμνουσι καὶ τὸν τοῦ δεκομένου τεθνεῶτα γονέα , ἀναμίξαντες δὲ πάντα τὰ κρέα δαῖτα προτίθενται · τὴν
δὲ κεφαλὴν αὐτοῦ ψιλώσαντες καὶ ἐκκαθήραντες καταχρυσοῦσι καὶ ἔπειτα ἅτε ἀγάλματι χρέωνται , θυσίας μεγάλας ἐπετείους ἐπιτελέοντες . παῖς δὲ πατρὶ τοῦτο ποιέει , κατά περ Ἕλληνες τὰ γενέσια . ἄλλως δὲ δίκαιοι καὶ οὗτοι λέγονται εἶναι , ἰσοκρατέες δὲ ὁμοίως αἱ γυναῖκες τοῖσι ἀνδράσι .
History. Herodotus. A.D. Godley. Cambridge. 1920-1925.
Tufts University provided support for entering this text.
This text was converted to electronic form by professional data entry and has been proofread to a medium level of accuracy.